康復之路進行中🚶🏻♀️… #自我紀錄
一直以來都有腰骨痛，痛到忍唔住年頭去做MRI先知原來去到椎間盤突出，keep住睇骨醫、做物理治療情況都時好時壞咁就由佢😟
去到5月～早幾年做手術嘅舊患復發，醫生一直搵方法去治療，期間除咗覆診果幾日，日日都要就住傷口去坐同訓，企5分鐘都好似撕裂成個人咁痛☠️(識我嘅人都知我係好捱得痛)所以條腰受壓都無辦法，因為舊患痛過條腰……情願就住傷口犧牲條骨🥺
最後舊患方面～解決方法係要做手術永久切除組織，依家舊口埋咗口，但係因為缺少組織關係生活上要小心謹慎，唔係第日老咗就有問題😞
舊患做完全身麻醉手術告一段落，就到要處理椎間盤突出嘅痛，彎住身好似隻🦐咁訓同坐一段長時間，原本都弱雞嘅脊椎骨就被直接KO，去到自理(著褲、去廁所、食飯彎少少身、跌嘢落地下係執唔到等)，媽咪話隔離屋9x歲婆婆都叻過我😖
又去翻睇骨醫、做物理治療、食神經止痛藥循環，除咗公司醫生，今次經好友介紹睇埋有軍醫資格做物理治療/整骨，再去出名中醫、跌打到針灸/拔罐，加上自己做運動拉筋，一連串燒錢💸加痛苦下，終於由差過9x婆婆去到5x歲嬸嬸機能，雖然行/企/坐/訓仲係痛，但起碼叫做行得到郁得下，係媽面前都扮到下嘢唔使佢擔心💔
雖然個人仲係好弱雞，但總算過咗最艱難痛楚時期，依家係可忍受到嘅痛。真心感激一直係我身邊支持愛護我嘅人，好老土但有病痛果陣真係唔同講法，平日成日比人話冷血嘅我，係醫院果陣媽咪一個電話都真係會眼濕濕🥲
咁多年一直以來都好鬼死多病痛💀全身麻醉手術都做咗5次，未計d大大少少局部麻醉，我都記唔到咁多😵💫依家唯有食健康d，多d做下運動，保持心情輕鬆過得一日就一日算🤷🏻♀️
Search